HIMANTA LEH HAMANA - Dr Ramdinthara Sailo

 HIMANTA LEH HAMANA

Dr. Ramdinthara  Sailo

 

Tuna kan ramri buaina phênah hian thil inmung thûk zâwk awmin a lang tlat mai! Zêldin thu mai ni lovin, tûn boruak kal zêlah hian kan lo inbuatsaih ṭhat loh chuan kan ram leh hnam tâna thil pawi thleng thei dinhmunah kan ding mêk niin a lang. Hetiang zâwng hian i han thlîr chhin teh ang:

 

1. A bul chu Hindutva a ni thei ang em?

Tun ṭum Assam nêna kan ramri buaina hi i han chhût chiang teh ang. Assam lam heti taka inpeih sâ leh Official pawimawh zawng zawng nêna an lo thawh dân te, râlthuam famkim leh Ambulance engemaw zât nêna an lo thawh chhuah dân te, Covid-19 avânga kan buai zual lai tak denchhena min rawn luhkhung dân te han en hian, ngunthlûk taka rêl fel diam hnua lo thawk an ni tih a chiang. Chu râlrêlna hmun chu Assam khawpui Dispur mai ni lovin New Delhi hial a ni thei ang em?

 

India ram pumpui Hindu culture hnuaia kûntîr tuma kawng hrang hranga hma la mêktu BJP party hian India hmar chhakah hian ṭan an la nasa êm êm a. Tûn kum 5 emaw lek hma lama MLA pawh nei pha ngai mang lo khân tunah chuan hmar chhak state 8 zinga 4-ah ro an rel mêk a (Assam, Tripura, Arunachal Pradesh, Manipur), 2 dangah MLA thawhin rorêl pâwlah an tel a (Nagaland, Meghalaya), a dang 2-ah NEDA kal tlangin rorêl lai party an thurualpui a (Sikkim, Mizoram). Heng hmar chhak state zawng zawngte hi National level-ah chuan BJP sawngawi zâwnpuite vek an ni. Hma an sâwn dân hi a namai lo teh asin!

 

Himanta Biswa Sarma, Assam CM hi mi hlauhawm leh tenawm tak a nihzia a lang chiang zêl. Mi pamham, dâwt sawi nâl tak, media hman ṭangkai dân hre tak, ama Politics hmakhua chauh ngai, a dinchanna tûra thil dik lo engpawh tih hreh lo, lehkha thiam leh dân hre fu si (MA (Pol. Sc), PhD, LLB) a ni. Central BJP sawrkarin North-East huam chhûnga fa chuam ena an en, NEDA Convener leh North-East state CM zawng zawngte chunga vawk lal lêna lêng mêk a ni. Modi-a sawrkar hian an la hmang ṭangkai dâwn chauh niin a lang.

 

Tûn ṭum ramri buainaah khân hnehtu nia kan inngaih laiin, Himanta-a 'game plan' chu a hlawhtling hlê tho niin a lang. National level leh khawvêl hmaah a chhe thei ang berin Mizote min han hêk a, media hmangin min dah

'offside' nasa hle mai. He a pawi khawih hi siam ṭhat a har tawh khawp ang. A hnuah thu dik pawh sawi ila, mite rinhlelh min kaitir tawh tho a ni.

 

2. CAA (Citizen Amendment Act) nên a inzawm em?

Bangladesh aṭanga lo lut Hindu-te chu he dân hian India khua leh tui nihna a pe nghâl a, tunah hian eng zât fakau nge lo lut tawh hriat a ni lo. Kumin Assam inthlan puiah khan BJP chuan Hindu chhungkaw nuai khat tân in hmun

3. Article 371-g leh ILP a khawih ang em?

Mizorama chêngte sakhua leh culture, hnam bil dân leh ram leilung humhalhna dân (Article 371-g) leh, hnam dangte laka min humtu ṭangkai tak, Inner Line Permit (ILP) te hi tûn boruak hian a nghawng ang em? Zawhna pawimawh tak a ni. Tun hnai vut vutah chuan a nghawng nghâl lo mai thei. Mahse, chîk lehzualin i han ngaihtuah teh ang.

 

Himanta Biswa Sarma hian tharum hmanga kan ram min rawn hnehchhuh a tumna chu, Mizote min lo zuam sual hret avângin a hlawhchham ta hrih a. Mahse, he misual leh fing vervêk tak, hausa leh thiltithei bawk si hian kawng danga chêt dân tûr a ruahman  leh diam tawh ang tih a chiang. Chung zingah chuan India ram dân leh Constitution kaltlangin min la bei ngei ngei ang tih a rinawm.

 

Thil chiang tak chu, Hindu culture chawi sângtu BJP sawrkar hian Jammu & Kashmir state humhalh bikna, Article

370 awlsam taka Parliament kal tlanga a ṭhiahsak ang khân, an duh phawt chuan Article 371 pawh hi an tibo thei khawp ang. RSS chhûl chhuak BJP thupui pakhat chu, "One nation, one culture" tih a ni. An zinga tam takin an duh chu kan inhung bîkna ILP te, Scheduled Tribe kan nih avânga reservation leh quota leh hamṭhatna dang kan neihte hi tihbo vek a ni. BJP hian Indian Parliament in hnih hi an control tlat avangin Constitution siam danglam (amendment) hi thil harsa a ni lo vang.

 

4. Himanta leh Hamana!?

 

Himanta Biswa Sarma hian tun ṭumah hian kan ram chu min chhuhsak thei lo mah se, Mizote chu Indian pawh ni

lo, Hindu sakhua leh culture duh lotu, drugs tawlhru ṭhin hnam, India ram tâna mi hnawksak niah min chhuah mêk a. Politics lama a dinhmun leh a chêt dân hian Lalnu Estheri huna Hamana kha min hriat chhuahtir teh tlat a!

 

Mizote hian he pa finrâwl leh kan ram lal (Modi-a) laka a tlâktlumna hi kan tluk pha ngai dawn lo. Tin, amah hi mi duhâm leh nihna duh, Assam CM nih mai pawh duh tâwk lova National level-a Minister pawimawh nih tum rân niin an sawi. Nakinah chuan he 'Hamana' hian kan ram leh hnam hi min la tibuai thui thei fu roh ang tih a hlauhawm khawp mai.

 

Chuvangin, tûn hi Zofate tân ṭawngṭai hun a ni. A theih phei chuan, Lalnu Estheri te ang khân chaw nghei te pawhin ṭawngṭai ila, kan Pathian leh a hming putu Zofate hi tute nge kan nih tih hi India ram leh khawvêl hian lo hre teh se!